Bugun, 6-dekabr kuni Axborot va ommaviy kommunikatsiyalar agentligi (AOKA)da Ekologiya, atrof-muhitni muhofaza qilish va iqlim o‘zgarishi vazirligi huzuridagi Chiqindilarni boshqarish va sirkulyar iqtisodiyotni rivojlantirish agentligi direktori maslahatchisi Rustam Tursunov ishtirokida brifing bo‘lib o‘tdi. Brifing sanitar tozalash xizmatida ishga tushirilgan yangi “Toza Makon-billing” dasturiy kompleksi va GPS tizimida abonentlar uchun yaratilgan qulayliklarga bag‘ishlandi.

8-dekabr — bosh Qomusimiz qabul qilinganining 32 yilligi arafasida shuni taʼkidlash joizki, yangi tahrirdagi O‘zbekiston Respublikasi Konstitutsiyasi — davlatimiz taraqqiyotining muhim tarixiy bosqichida qabul qilingan bo‘lib, jamiyatimizning kelgusidagi rivoji va ravnaqining ustuvor yo‘nalishlarini belgilab bergani bilan ahamiyatlidir.

O‘zbekiston Respublikasi Konstitutsiyasini so‘zsiz va to‘liq amalga oshirish, unda belgilab berilgan ustuvor prinsiplar va normalarni amalda tadbiq etish hammamizning oldimizda turgan muhim vazifa hisoblanadi.

Jami 6 bo‘lim, 27 bob va 155 ta moddadan iborat bo‘lgan Yangi tahrirdagi Konstitutsiyada “Inson-jamiyat-davlat” tamoyili ko‘ra, inson manfaati ustunligi, xususan ekologik huquqlarini taʼminlash davlat kafolatida ekanligiga urg‘u berilgan.

Shu o‘rinda, uning 9-bobi “Iqtisodiy, ijtimoiy, madaniy va ekologik huquqlar” deb nomlanib, unda tegishli moddalar orqali:

• Har kim qulay atrof-muhitga, uning holati to‘g‘risidagi ishonchli axborotga ega bo‘lish huquqiga egaligi;

• Fuqarolar atrof tabiiy muhitga ehtiyotkorona munosabatda bo‘lishga majburligi;

• Davlat fuqarolarning ekologik huquqlarini taʼminlash va atrof-muhitga zararli taʼsir ko‘rsatilishiga yo‘l qo‘ymaslik maqsadida shaharsozlik faoliyati sohasida jamoatchilik nazoratini amalga oshirish uchun shart-sharoitlar yaratishi haqida belgilab berilgan.

Shu jumladan, chiqindilarni boshqarish cohasiga ham axborot-kommunikatsiya texnologiyalarini joriy etish, rivojlantirish orqali abonentlar va to‘lovlarning aniq hisobini yuritish, billing tizimida elektron to‘lov tizimlarini takomillashtirish, to‘lovlarni amalga oshirishda qulay sharoitlar yaratish hamda debitor qarzdorliklarni qisqartirishga alohida eʼtibor qaratilmoqda.

Bu borada qattiq maishiy chiqindilarni to‘plash va olib chiqib ketish xizmatlari uchun mavjud qarzdorlik to‘g‘risida “SMS” xabarnoma yuborish va mazkur qarzdorlik bartaraf etilganidan keyin ko‘chmas mulk hamda avtotransport vositalari bilan bog‘liq notarial harakatni amalga oshirish tizimi yo‘lga qo‘yildi.

Xususan, shu paytga qadar foydalanib kelingan billing tizimining maʼnan eskirganligini inobatga olgan holda, bugungi kun talablariga javob beradigan keng imkoniyat va funksiyalarga ega bo‘lgan qulay tizimni yaratish maqsadida “Toza Makon” billing elektron davlat axborot tizimi ishlab chiqilib, joriy yilning noyabr oyidan foydalanishga topshirildi.

Mazkur tizim Ichki ishlar va Adliya vazirliklari, Bojxona va Chegara organlari, Kadastr agentligi, “Hududiy elektr tarmoqlari” aksiyadorlik jamiyati maʼlumotlar bazalari bilan integratsiya qilindi. Natijada tizimda maʼlumotlarning aniq va shaffof shakllanishi taʼminlandi.

Shu bilan birga, “Raqamli hukumat” tizimi foydalanuvchilarini identifikatsiyalashning yagona axborot tizimi yaʼni “ONE ID” bilan o‘zaro integratsiya qilinib, maʼlumotlarning xavfsizligini taʼminlashning muhim choralari ko‘rildi.

Bunda abonent to‘g‘risidagi maʼlumotlar fuqaroning pasport maʼlumotlari orqali avtomatik ravishda to‘ldiriladi. Abonent istiqomat qiluvchi xonadon kadastr maʼlumotlarining avtomatik shakllanishi hisobiga ushbu xonadonda ro‘yxatdan o‘tgan shaxslar to‘g‘risidagi maʼlumotlarni olish orqali fuqarolarga ko‘rsatilgan xizmatlar uchun xaqqoniy to‘lovlar hisoblanishiga erishildi. Ushbu chora-tadbirlar tizimda noreal debitor qarzdorliklarning shakllanishini oldini olishga xizmat qilishi bilan ahamiyatlidir.

Qolaversa, aholiga qulaylik yaratish maqsadida billing platformasi “Paynet”, “Payme”, “Upay”, “Click” va “Uzum” kabi barcha elektron to‘lov tizimlari hamda Markaziy bankning “Munis” tizimi bilan o‘zaro integratsiya qilindi. Natijada ko‘rsatilgan sanitar xizmatlar uchun fuqarolar tomonidan istalgan vaqtda to‘lovni amalga oshirish imkoniyati yaratildi.

Bugungi kunda respublikada mavjud 212 ta shahar va tumanlarning 9 412 ta mahalla fuqarolar yig‘inidagi 7 mln 136 ming abonentlar kadastr raqami bo‘yicha billing tizimiga kiritildi.

Respublika bo‘yicha sanitar tozalash korxonalarining 2 967 nafar nazoratchisidan 2 492 nafari uchtasi birda to‘lov terminali bilan taʼminlanib, ushbu ishlar davom ettirilmoqda.

Hozirda sohada faoliyat yuritayotgan 155 ta sanitar tozalash korxona tasarrufidagi jami 4 194 ta texnikaning 3 450 tasiga yaʼni 82,5%ga GPS qurilmalari o‘rnatilgan.

Yana bir muhim jihati, yangilangan «Toza Makon» billing elektron platformasini GPS onlayn kuzatuv tizimi bilan integratsiya qilingani aholiga ko‘rsatilgan sanitar tozalash xizmatlar va xisoblanadigan oylik to‘lovlarga aniqlik kiritish hamda xizmat ko‘rsatuvchi sanitar korxonalarning masʼuliyatini yana-da oshirishi bilan ahamiyatli bo‘ldi. Natijada ko‘rsatilmagan xizmatlar uchun asossiz to‘lovlar hisoblanishining oldi olinib, xizmat sifati oshishiga erishiladi. Bu esa o‘z navbatida sanitar tozalash xizmatlarini yangi bosqichga olib chiqadi.

Eʼtiboringiz uchun rahmat!

Fotogalereya

Sanitar tozalash xizmatida yangi “Toza Makon-billing” dasturiy kompleksi va GPS tizimi ishga tushirildi