Sizda maishiy chiqindilarni to‘plash va olib chiqib ketish bo‘yicha xizmat ko‘rsatilmagani yoki sifatsiz xizmat bo‘yicha murojaat mavjudmi? Bu kabi holatlarda ko‘rsatilmagan yoki tegishlicha sifatda bo‘lmagan xizmatlar to‘g‘risida dalolatnoma tuzilishi kerak bo‘ladi. Ushbu dalolatnoma isteʼmolchi va xizmat ko‘rsatuvchi tashkilotning hamda fuqarolarning o‘zini o‘zi boshqarish organlari yoki xususiy uy-joy mulkdorlari shirkati vakillari tomonidan imzolanadi. Dalolatnoma maishiy chiqindilarni to‘plash va olib chiqib ketish bo‘yicha to‘lovlar miqdorini qayta hisob-kitob qilish uchun asos hisoblanadi.

Maʼlumot o‘rnida: Dalolatnoma isteʼmolchi, xizmat ko‘rsatuvchi tashkilot, fuqarolarning o‘zini o‘zi boshqarish organlari yoki xususiy uy-joy mulkdorlari shirkati vakillarining imzolari bo‘lganidagina haqiqiy sanaladi. Shuningdek, xizmat ko‘rsatuvchi tashkilotning vakili kelmagan yoki dalolatnomaga imzo qo‘yishdan bosh tortgan taqdirda fuqarolarning o‘zini o‘zi boshqarish organlari yoki xususiy uy-joy mulkdorlari shirkati vakilining imzosi yetarli hisoblanadi.

Misol uchun, fuqaro xonadonida jami 7 ta kishi istiqomat qilsa, ular har oyda maishiy chiqindi uchun 50 000 so‘m to‘lov qiladi. U istiqomat qiladigan hududga may oyida maishiy chiqindilarni olib chiqib ketish uchun hududga biriktirilgan sanitar tozalash korxonasi bir oyda 8 marta emas, 4 marta kelib, xizmat ko‘rsatgan bo‘lsa fuqaro mazkur oy uchun 25 000 so‘m to‘lov qilishi kerak bo‘ladi. Ushbu holat esa fuqaro, sanitar tozalash korxonasi va MFY vakillari ishtirokida dalolatnoma orqali rasmiylashtirilishi lozim bo‘ladi.

Eslatib o‘tamiz, qattiq maishiy chiqindilarni olib chiqib ketishning minimal davriyligi chiqindi to‘plash shoxobchalaridan — bir kunda bir marotaba va yakka tartibdagi turar joy sektoridan esa “signal” usulida — uch kunda bir marotabani tashkil qiladi.

Mazkur tartib Vazirlar Mahkamasining 2019-yil 6-fevraldagi 95-son qarori bilan tasdiqlangan “Qattiq va suyuq maishiy chiqindilarni to‘plash va olib chiqib ketish bo‘yicha xizmatlar ko‘rsatish qoidalari”ga asosan belgilangan.

Yangiliklar